1. 置業

情(成)人節快樂 – 現實的美好將來

估唔到呢一個成人節系列咁多人有共嗚,所以隊長又繼續手痕寫多篇,因為上篇係講,究竟係香港而家想做中產有層樓仔的疑似幸福的人的條件,不過生存的人很多,但生活的人,其實要求卻是更高。


當你細心觀察一下,有好多車在大街上走著,好多小朋友由工人帶著人來人往,小小年紀說出流利英文,進進出出的是私校的鬼婆幼兒園,然後鏡頭又一跳,一些衣香濱影的人在五星級酒店喝著英式紅茶,然後走到酒店的代客泊車處,隨便給了100元小費,一家人就輕輕鬆鬆上車回自己的所謂中產的家,這些人,又到底是什麼模樣的人,要搵幾錢先可以生活係另一個層次的境界?


是這样的,如之前分享過一篇文章,超級有錢人,是擁有著金字塔,所以如果你係有錢佬的話,生活是美好的。然而,有錢佬係香港點都係少數,然後剩下來的,只係金字塔內的人,有些是塔尖的,有些卻只是中間,但積極往上爬。在街上,無人翻開底牌,你我也不知道究竟誰比誰更靠近塔尖,不過就隊長所觀察,當好大部份人過了可能金字塔的一半,就會好有衝動想做金字塔頂的人,然而現實係你搵幾多賺幾多並不是因為你去充而能改變的,特別在香港這個M型社會下,越去充,越易令自己加大負擔,但野心同生活品質以設至很高,收入就算增加卻都不能追上慾望,有些感情就會在40-50歲的時間更被磨至体無完膚。


先回帶至上一篇,其實一對普通的情侶,如果係諗住自己可以做更優秀的人的話,係香港,至少你首先搞得掂果200萬的結婚同首期,清袋後還能應付所謂的成人自住責任開支,以沒有太多家底的人黎講,估計起碼兩公婆十萬只是入門。有好多人認為,兩公婆加埋十萬其實唔錯啦,如果你認為係咁的話,隊長只能話小朋友你的層次實在還是太年輕。不是說隊長搵多少的問題,只係當你經歷過,你就會發現你又想有將來,又想住大D,又想有工人有車,然後又懶係中產咁,十萬,美其名只係可以充中產,但並不足以令你完全成為一個中產。當然時間累積一定的財富可以改變,但呢個又係一個時機問題,即係比如隊長一直說十一月入市係良機,如果你買左層樓,可能已經無啦啦執50至100萬,如果用時間量化,可能就等於三兩年時間的錢,但這只適用於你係有投資眼光同獨立思考的人,而如果你無呢一種能力,十一月的你同而家的你,最多都係儲多十萬八萬,甚至無,想突破又如何難?


做一個比一般人不平凡的中產,本來駛費就會高,因為係眾多選擇中係唔駛太去選擇,即係乜都OK LA,負擔到,因此駛得起就會駛。咁如果你高於十萬就應該好少少,幾多就再講,但如果你得十萬又學人咁駛,其實一個月剩得幾多,有數計,好大機會,都係無乜錢剩。試問,無乜錢剩,又如何支付向上爬的機會同消費呢?


上文講到好多情侶到40-50,就會更加現實,點解?因為捱就捱左十年八年,仔女大了而自己再努力工作也可能是在樽頸位中不斷突破那小小的樽頸,然而所謂的稍好的中產係呢D時間,要面對的可能係買大間D屋住,買下收租樓,又或者小朋友出國讀書之類等等。很抱歉,以上的目標,全部全部,以今天香港同世界的物價黎講,相信有9成的後生仔可以話諗都唔駛諗,除非你有家底。理論上,就當你兩公婆係專業人仕,呢家買層實用千呎的三四房,動不動都二三千萬,首期一千多萬,醫生律司,都唔代表你可以穏陣地買到,不過時間唔等人,經濟層面追唔到,唔代表小朋友的成長會停下來,原先住住先的兩房或小三房,可能已經不適用,但你仍困在那朝九晚五的專業人仕肉身,十九幾萬一個月收入又如何,係支持唔到樓價就支持唔到,支持到都唔代表你甩難,因為清你袋後又係由頭黎過,供過千萬按揭,好易四五六萬一個月,比你供你都供到嘔血。


香港同國內亦祟上一股海外讀書風,稍有能力的父母,都可能會考慮將子女送出國,浸下番黎鬼鬼地講下英文扮下ABC咁,感覺自己都高上D,而呢件事的成本同買樓其實都唔係差好遠,基本上英美澳加任你揀,搞完一輪當你四年學費生活費,100-150萬一個小朋友走唔甩,如果你有兩三件就更加恭喜你,全部都係以百萬百萬計。


以上的情況,老實講隊長並沒有說得很富裕,沒有講什麼收租樓什麼投資,就簡簡單單充下所謂的中產,你可以已經幻想到,有一部份人根本連充都充唔到。而充到的,老實講十萬都真係好抆水以今日的能力黎講。個人認為,家庭收入15-20萬,也許才可以過一個似係較普通人好D的人生(不是富人),但係而家的年青情侶,你同佢講呢個數字,有好多人只會覺得係天方夜潭,又或者根本唔會思考裡面的智慧,不過的的確確,只係想稍微做一個比一般人高一點的人,對不起,三五萬月入如果你已經好自滿的話,只能說少年你太年輕了。


所以,好多小朋友係30歲談婚論嫁,愛一個人就決定行走一生,這沒有錯,因為係香港絕對唔會死亦唔會有乜問題。要生存,一定得,但前題係兩位都最好有一样的價值觀,以後的人生無甚比自己收入更大的要求就可以了。不過,撫心自問,隨住80後都變中坑的年代,90後00後都慢慢接力了上來,這兩個年代的人受盡寵愛吃好住好玩好,生活追求品質,但突然發現原來要追趕所謂的基本要求,現實卻是這麼遠,老實講磨擦只會越來越多。隊長現實及悲觀的說,真的很對不起,自QE同高物價高樓價的年代,現實的殘酷迫害只會有增無減,80後還有一水人上了岸可以自High一下,90後00後沒有家底想突圍? 基本上極難,有的也是少眾,所以真愛並不會在年青時減少,但是在成長中,90同00後將會遇到更多的現實困難挑戰,當中有多少人能捱過,又有多少人能突圍,答唔到。然而隊長只知道,有時真係不得不從現實考慮一下,面包和愛情,同時都有當然最好,但如果最終愛情都會被現實消耗的話,咁就要諗清楚,自己的幸福該如何抉擇,有時人一生,一個決定,就會令你福澤一生,又或是遺憾半生。

http://hk80captain.blogspot.com
Do you like 80后求生隊長's articles? Follow on social!
沒有評論
Comments to: 情(成)人節快樂 – 現實的美好將來

登入

歡迎加入 Miracoup
方便的閱讀是您能感受到的第一件事。
加入 Miracoup